PR-çı gözləməz

0
583

Bəzən alış-veriş mərkəzlərində, banklarda, müxtəlif xidmət obyektlərində növbələr xeyli vaxt alır. PR-çılar müştərilərin gözləmə müddətindən yararlanırlarmı? Necə yararlana bilərlər?

Bu suala cavab tapmaq üçün bir neçə PR-çı ilə söhbətləşdik.

PR mütəxəssisi Kamran Əliyevin fikirincə, müştərilərin gözləmə müddətindən yararlanmaq qarşılıqlı kommunikasiyaya xidmət edə bilər: “Bilavasitə əhali qrupları ilə işləyən bir çox xidmət müəssisələri gündəlik fəaliyyətlərində çoxsaylı müştərilərlə təmasda olurlar və həmin müəssisələrin ictimaiyyətlə əlaqələrə məsul əməkdaşları bundan özünəməxsus şəkildə yararlana bilərlər. Bu, müştərilərə xidmətin növbəlilik prinsipi əsasında qurulduğu müəssisələrdə (banklar, supermarketlər, AVM-lər və s.) xüsusilə aktual ola bilər. Məsələn, növbə ərzində müştərilərə qarşılıqlı maraqlı ola biləcək müxtəlif mövzularda (xidmətin səviyyəsi, irad və təkliflər və s.) ekspress sorğularla müraciət etmək olar. Adətən bu kimi fəallıqlar müştərilər üçün xoş olur; müştəri pul və vaxt sərf edərək xidmət aldığı təşkilatın fəaliyyətinə bu və ya digər dərəcədə cəlb edilmə hissini məmnunluqla qarşılayır. Bu öz-özlüyündə müştəri ilə təşkilat arasında qarşılıqlı ünsiyyəti təmin edir ki, PR-da buna kommunikasiyanın “ikitərəfli simmetrik modeli” deyilir. Təcrübə göstərir ki, hədəf auditoriyaları ilə ünsiyyətini məhz bu model əsasında quran təşkilatlar həm biznesdə, həm də fəaliyyətinin qeyri-maddi aspektlərində daha çox uğur qazanırlar”.

Maraqlı ola bilər: PR “qurbanlar” tələb edir

PR mütəxəssisi deyir ki,  bu cür sorğular yorucu və  konkretlikdən uzaq olmamalı, müştəri ilə ünsiyyət nəzakətlə və etik qaydalar çərçivəsində aparılmalıdır. Burada başlıca məqsəd müştərinin fikrinin təşkilat üçün önəmli olduğunu göstərmək olmalıdır.

Kamran Əliyev həmçinin bir müştəri olaraq hansısa xidmət məkanında belə bir üsuldan istifadə olunduğunu görmədiyini deyib.

PR mütəxəssisi Əli Hacızadə isə düşünür ki, PR-çının növbədən yararlanıb-yararlanmaması xidmət sektorundan  və bir sıra məsələlərdən aslıdır. “Məsələn, növbəni nə üçün gözləyirlər? Nə qədər adam gözləyir? Gözləyənlər kimlərdir? Günün hansı saatında ən çox gözləyirlər  və s.   PR-çılar müştərilərin gözləməsi zamanı əlavə mal və servislər təşkil edə, sorğular keçirə bilərlər. Variantlar çoxdur”.

PR mütəxəssisi deyir ki, növbələrdən adətən satış və marketinq şöbələri yararlanır. PR-çılar isə növbə ilə çalışmır. Bu ancaq səbəb və zərurət yarandıqda baş verir.

Maraqlı ola bilər: Qablaşdırma da PR-dır

Dünya təcrübəsində isə, yemək gözləyən müştərilərə qısa filmlər, yeməyin hazırlanması prosesini əks etdirən 3D animasiyalar nümayiş etdirən restoranlar, liftə güzgü quraşdırmaqla, musiqi səsləndirməklə müştərilərini darıxmağa qoymayan çoxmərtəbəli otellər və başqa misallar var.

PRoloq.az

Şərh yoxdur

Şərh yaz